პოსტკოვიდურ პერიოდში შრომის კანონმდებლობის აღსრულებასთან დაკავშირებულ გამოწვევებზე იმსჯელეს „ეკონომიკური პოლიტიკის ადვოკატირების კოალიციის“ (EPAC) მიერ ორგანიზებულ შეხვედრაზე. შეხვედრის მონაწილეებს მისასალმებელი სიტყვით დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა მიმართა, რომელმაც ახალი შრომის კოდექსით შემოთავაზებულ სიახლეებზე ისაუბრა.

„დარგობრივი ეკონომიკისა და ეკონომიკური პოლიტიკის კომიტეტი ღიაა ნებისმიერი ინიციატივისთვის, რომლითაც შესაძლებელი ხდება ეკონომიკის სწრაფი აღდგენა და  ბიზნესის ხელშეწყობა. შეხვედრაზე ვისაუბრეთ იმ გამოწვევებზე, რომელიც შრომის ახალ კოდექს ახლავს. სხვადასხვა ფორმატში დისკუსია და მსჯელობა მომავალშიც გაგრძელდება. ამ შეხვედრების მიზანია მივიღოთ ისეთი გადაწყვეტილებები, სადაც დაცული იქნება იმ სუბიექტების უფლებები, რომლებიც შრომით ურთიერთობებში არიან ჩართულნი“, - განაცხადა დავით სონღულაშვილმა.

ბიზნეს ასოციაციის კოალიცია 50-მდე ბიზნეს ორგანიზაციას აერთიანებს. შეხვედრა ამერიკის შრომის დეპარტამენტის მიერ დაფინანსებული პროექტის ფარგლებში გაიმართა.