აბაშის მუნიციპალიტეტის სოფელ ონტოფოში ძლიერი წვიმის შედეგად ადიდებულმა მდინარე ნოღელამ კალაპოტი გაარღვია, რის გამოც 25-მდე ოჯახს პრობლემები შეექმნა.

მდინარის ადიდების შედეგად დატბორილია საცხოვრებელი სახლების პირველი სართულები, ეზოები, სავარგულები, ცენტრალური გზა. რამდენიმე ოჯახს გაუნადგურდა ტექნიკა.

სოფელში იმყოფებიან აბაშის მუნიციპალიტეტის მერიის, სამაშველო სამსახურის წარმომადგენლები და სამართალდამცველები. აბაშის მერიაში აცხადებენ, რომ მოსახლეობას საფრთხე აღარ ემუქრება. მათივე ცნობით, სპეციალური კომისია შეისწავლის ზარალს და ყველა დაზარალებული მიიღებს დახმარებას.