ირმა ინაშვილი, "ფეისბუქის" საკუთარი გვერდის მეშვეობით სპარტაკ ბუკიას გარდაცვალების ამბავს ასე ეხმაურება:
"ბევრი თემაა დღეს აქტუალური, მაგრამ ამ წუთებში ყველაზე მეტად ერთი ადამიანი- სპარტაკ ბუკია მაფიქრებს...
მაფიქრებს ჩვენი საზოგადოების ნაწილის სისასტიკე, დაუნდობლობა, ცინიზმი, უსულგულობა...
ისინი ფეისბუქ - ზომბები არიან, რომლებიც ყველას და ყველაფერს ჭამენ.
ისინი იცინიან ყველასა და ყველაფერზე...
აბუჩად იგდებენ ყველას და ყველაფერს...
სამწუხარო ის არის, რომ შემდგომ ეტაპზე ფეისბუქ- ზომბების ამ ცინიზმს ავტომატურ რეჟიმში ჰყვება საზოგადოების სხვა ნაწილი... ისიც იწყებს სიცილს. გაუაზრებლად დასცინის ობიექტს, მსხვერპლს, რომელსაც არაფერი დაუშავებია...
ეს ბოროტი სიცილი, დაცინვა, ცინიზმი, შეურაცხყოფა გადადის გიჟურ ექსტაზში.
მერე ფეისბუქ-ზომბები მსხვერპლის თრევით იღლებიან, ბეზრდებათ. უკვე შეჭამეს!
სპარტაკ ბუკია გარდაიცვალა. როგორც ამბობენ,- ძალიან წესიერი, კეთილი ადამიანი. სად ხართ ახლა, ფეისბუქ- ზომბებო, რატომ არ იცინით?!..."- წერს ინაშვილი.