სერიალ ,,გრეის ანატომიის" პროდიუსერის კრისტა ვერნოფის განცხადებით, პოპულარული სამედიცინო დრამის „გრეის ანატომია“ ახალ სეზონში კორონავირუსის პანდემიის საკითხს შეეხებიან. 

მისი თქმით, უცნაური იქნებოდა თუ ამერიკული ტელევიზიის ყველაზე პოპულარული დრამა ამ მნიშვნელოვან თემას გვერდს აუვლიდა. სცენარს საფუძვლად ნამდვილი ექიმების მოგონებები დაედება.

„ყოველ წელს ჩვენთან ექიმები მოდიან და თავის ისტორიებს გვიყვებიან. ჩვეულებრივ ისინი რამე სასაცილოს ან წარმოუდგენელს ჰყვებიან, მაგრამ წელს ყველაფერი შეიცვალა. ეს საუბრები უფრო თერაპიას დაემსგავსა. ექიმები გადატანილ ემოციებს იხსენებენ, კანკალებენ და ცდილობენ არ ატირდნენ. კორონავირუსზე ისე საუბრობენ, როგორც ომზე, რომლისთვისაც მზად არ იყვნენ“, - აცხადებს ვერნოფი.

„გრეის ანატომია“ ABC-ს ეთერში უკვე 15 წელია გადის. სერიალის მე-17 სეზონის გადაღებები კარანტინის გამო ჯერ არ დაწყებულა. შესაბამისად, სეზონის პრემიერა ჩვეულებრივზე გვიან გაიმართება.